Mar 11, 20226 min read

026 台灣建國ê工程師-林哲夫

Updated: Mar 11, 2022

2004年牽手護台灣ê運動感動真濟人，你kám知影tī āu-piah 推捒非暴力運動幾十年，造成這運動大成功--ê，tō是tī加拿大hōo國民黨列做烏名單ê物理教授林哲夫？請來聽「台灣建國工程師」林哲夫ê故事！看不懂台文，點連結讓李講古我來聽Podcast讀給你聽

文稿編寫：林琪蓁校對：吳鈺瑾、陳翔容

林哲夫（Lîm Tiat-hu）教授tī宜蘭羅東出世，家境散赤，阿叔贊助伊去淡水中學讀冊。淡水中學是馬偕博士ê後生創立--ê，是當時上出名ê西式中學。彼時伊已經是15歲ê高齡學生，才上第一學期niā-niā，台灣發生二二八事件，校長陳能通被掠去銃殺，老師盧園、黃阿統和kuí-nā ê學生被關，學校ê師生lóng驚惶萬分，m̄知當時會去hőng掠去。這擺ê人生經歷林哲夫永遠袂去hōo袂記--得。

讀完初二了後，阿叔suah生理失敗，無法度koh再kā伊支持--ah。佳哉加拿大一間教會ê會友捐錢供應林哲夫讀冊。校長陳泗治（Tân Sù-tī）除了替伊納厝稅以外，koh提供三頓ê tsia̍h-si̍t，並且教伊彈鋼琴，不斷--ê kā伊鼓勵。Tsia-ê人情到今猶是記記在心，便若講著tō會目屎流。

讀完淡水中學考入去公費ê師範大學理化系，1960年，申請tio̍h加拿大多倫多大學ê獎學金。Tshím到多倫多無偌久，tō熟似tio̍h化工博士生黃義明（N̂g Gī-bîng），伊提一本tú對日本寄來ê《台灣青年》創刊號，雜誌內容lóng是台灣m̄-bat看--tio̍h、林哲夫想欲探討ê題材。林哲夫看tio̍h這本雜誌，規身軀suah熱phut-phut，心肝phōng-phōng-tsháinn。

1965年彭教授被lia̍h了後，Canada ê台灣學生到Ottawa 示威ê報導。中央為林哲夫教授，戴帽仔為黃義明教授。(陳星旭提供，來源：https://reurl.cc/AKX7rj )。

參與救援彭明敏教授的行動 1963年好友黃義明tī Waterloo大學教冊ê時，成立「台灣同鄉會」，逐家共推黃義明教授為會長，會員內有部分意識形態khah sio-kâng ê同鄉，koh再成立「台灣人權委員會」。1964年台大法學教授彭明敏kah學生謝聰敏、魏廷朝發表《台灣人自救宣言》被國民黨政府掠去，消息傳到多倫多，「人權委員會」即時展開救援行動，除了寫批、拜會國會議員、政府機關以外，mā向國際發聲。彼時，khah一通國際電報，是ài 52 khoo 加幣，tú-hó 是林哲夫兩個月ê厝稅錢。In kā募款--來ê百通箍，一通khà去hōo瑞士日內瓦ê國際法學協會，另外一通是khà去hōo倫敦ê國際特赦組織。

結果，瑞士ê「國際法學學會」派人去出席彭明敏ê調查庭，國際特赦組織tō kā彭明敏kah謝聰敏、魏廷朝列為當年ê良心犯，指定瑞典支部為負責救援ê窗口，tsit兩通國際電報發揮了上大ê效果！1965年彭明敏等宣判彼工，黃明義、林哲夫等五人去到首都渥太華ê台灣大使館示威抗議。這ê行動引起加拿大國家廣播電台ê關心，tō是án-ne去hōo國民黨政府列為海外烏名單，就此tō bē-tàng轉去心愛ê故鄉--ah。

林哲夫ê牽手郭哲欽（Kueh Tiat-khim），是台灣第一位留美牧師郭馬西ê千金。Hip tī 二二八紀念公園。

佳哉，這時有一位牧師ê查某囝，欣賞tio̍h林哲夫ê正義感kah對台灣ê疼心。這位郭哲欽（Kueh Tiat-khim）小姐，是台灣第一位留美牧師郭馬西ê千金，新加坡出世--ê，tī日本大漢，16歲轉到台北讀北一女koh去台灣神學院讀冊，1954年到美國Ohio神學院研究教育kah宗教。1966年嫁hōo林哲夫，婚後，林哲夫專心讀冊，提tio̍h多倫多大學ê核子物理博士，同時mā好運--ê得tio̍h萊爾森科技大學ê聘請，自án-ne tī這間大學教冊27冬。

1972年林哲夫為tio̍h beh表示推sak台灣獨立ê決心，開始留喙鬚，伊咒誓講：台灣無獨立，我喙鬚tō 無欲剃！

1979年台灣發生高雄事件，國民黨政府全面逮捕國內ê異議人士。林哲夫動用伊tī 教會ê力量，m̄-koh tú-tio̍h部分保守教友ê反對。林哲夫只好退出原教會，和意識khah sio-kâng ê同鄉另外組立「多倫多台灣人聯合教會」。新教會ê初期欠缺牧師，林哲夫請求總會Robert牧師幫贊，in兩人suah變做好朋友。1982年林哲夫邀請Robert牧師來參加台灣人ê過年，彼工伊tshuā一位韓國朋友吳在直先生，吳--先-生是普世教協Urban Rural Mission (URM) ê亞洲負責人。URM是組織民眾用非暴力、用愛、用公義ê模式，爭取家己權利ê訓練機構。

URM上成功ê例是立陶宛抵抗蘇聯ê極權了後，變成tsi̍t ê 獨立ê國家。林哲夫趕緊問吳在直是án-tsuánn訓練、是án-tsuánn組織--neh？吳--先-生講URM加拿大總部tō tī離lín tsia兩條街niā-niā。隔轉工透早，林哲夫三步做兩步，用tsông--ê到URM總部。櫃台小姐Joyce 幾年後回想講，Albert Lim行入來辦公室ê時，kui-ê 面發--tshut-lâi ê光彩，kā 辦公室照kah光iànn-iànn。林哲夫感慨--ê講：tshuē這種ê非暴力訓練，tshuē 17年--ah，殊不知竟然離我兩條街niā-niā，這短短ê 200公尺，竟然愛行17年！

經過Joyce ê安排，林哲夫見tio̍h計畫主持人Dr. Edgar File，是York大學社會學教授，兩ê人一見面tō tsiânn投機。In計畫為民主運動ê領導者製作濃縮版ê訓練營。Tī兩禮拜ê訓練過程中Dr. File強調--ê是愛先思考「人民ê疼」是tī tó-uī？針對議題設計出社會企劃案，koh再探討出企劃案ê可能性，如果會使，及時著手推動。

林哲夫講：「台灣人食西餐khah bē合，旅社koh siunn貴，in lóng tuà tī阮兜，為tio̍h beh khah好轉倒，我會拜託牽手tshuā囡仔去朋友兜tuà，規間厝tō變做台灣URM訓練基地--ah。」聯合教會ê牧師、教會兄姐會來厝--裡鬥煮食，做司機接送，逐家歡喜做kah無閒tshih-tshih。第一期ê學員有洪奇昌、蔡明憲等七人，in lóng感覺這ê訓練愛擴大tī台灣舉行，特別邀請Dr. File去台南神學院講授URM ê「社會倫理」一年。真可惜--ê是教到一半去hōo抓耙仔報去警備總部，國民黨政府情治人員開始對Dr. File密切監視，m̄-nā 一直干擾伊上課，mā一直對學校施壓，Dr. File不得不離開台灣。

三年以來多倫多ê台灣URM訓練營訓練出廖碧英、翁金珠、劉峰松、蔡有全，原住民有伍錐（Alang IsLituan）、巴燕達魯（Payen Talu）等，學員轉lâi到台灣陸續推動企畫案如：1985年廖碧英ê未成年妓女保護「彩虹專案」、布農族ê伍錐爭取原住民ê土地「還我土地」。1988年鄒族學員kā tshāi tī嘉義火車頭前騙子吳鳳ê銅像giú--落-來，吳鳳鄉正名做阿里山鄉，教科書內有關吳鳳欺騙人民ê故事，lóng kā提提hìnn-sak。一直bē-sài講ê二二八事件，紀念碑tī嘉義tshāi起，台灣開始邁入去社會正義ê過程中。 非暴力運動的信念

1990年2--月林哲夫去參加哈佛大學內舉辦ê「非暴力制裁會議」，非暴力運動大師Dr. Gene Sharp詳細--ê紹介198種「公民防衛術」，教導手無寸鐵ê民眾，beh án-tsuánn以非暴力模式，對抗koh強koh雄ê獨裁政權。大師Dr. Sharp講：「非暴力運動是愛，m̄是恨；是主動--ê，m̄是被動；是挑戰不義--ê，m̄是beh傷害執行不義ê人；是自我受苦，m̄是beh殘害對方；是公開--ê，m̄是秘密行動。波羅的海三小國、烏克蘭、塞爾維亞、緬甸等國家，用Dr. Sharp 198種ê公民防衛術，竟然hōo獨裁者讓步，紛紛獨立。」Dr. Sharp ê 每一句話，lóng觸動tio̍h林哲夫ê心肝穎仔。林哲夫隨去邀請Dr. Sharp會當去台灣演講--無，可惜--ê是大師ê行程老早tō安排滿滿。伊推薦貴格會bat受過非暴力行動訓練ê教友四ê人，做訓練講師。林哲夫tī多倫多開設URM高級班後，koh請這四位講師去台灣講授198種ê公民防衛術初級班kah中級班。

1994年ê熱--人，林哲夫突然接tio̍h Dr. Sharp ê電話：「Albert Lîm！年底我會使去台灣--ah！」這天大好消息傳到台灣，幹部tō趕緊安排兩禮拜ê行程。Dr. Sharp tsiânn有誠意tī台北、台中、高雄lóng總做十場ê公開演講，場場爆滿，聽眾是插插插，mā tī國防部戰爭學校做一場非公開演講。林哲夫iáu特別安排伊tī立法院舉辦「非武裝國防」ê公聽會。

1990年代是台灣街頭運動上蓋ka-ia̍h ê時期。Lán台灣tō是有經過URM訓練出來9000 ê志工，in成功--ê運用198招公民防衛術，tī一波koh一波ê街頭抗爭運動中，kā台灣sak向獨立ê路程。2000年3--月，林哲夫親身看tio̍h獨裁統治台灣五十年ê國民黨倒閣--ah，手無寸鐵ê台灣人，這馬會使當家做主，看tio̍h這ê改變林哲夫歡喜kah目屎流--落-來。

手牽手護台灣

2004年2月28，林哲夫一生難忘ê情景竟然發生--ah！總統大選進前三禮拜，台灣人民自動自發--ê khiā--出-來，uì台灣頭到台灣尾，手牽手護台灣成做一尾活龍。這種情景tō是15年前波羅的海三小國，人民手牽手對抗極權蘇聯，成功爭取國家獨立，kāng款仔kāng款ê情景再度發生，林哲夫khah早引進ê URM訓練，這馬發生了效果，長久拍拚ê心血，得tio̍h安慰--ah，林哲夫教授激動kah目屎suah流--出-來。